LAMTHE

01. Penang an akitap ke chomat nangji, penang an akitap     ke heje nangji lapen penang an akitap ke joilut nangji.

02. Asapso ankok pen ta arni atur thek-long, lason         thakthak si masapso akam pen ta monit a-ot adur chini-i.

03. Epak akitap keme kaphangno, lapen inut amonit  aphan kedoihet, thangnat ta prekpre.

04. Monit, emethang aphan kachereng chot le kechokji kali, bang aphan ta rengpi nangji.

05. Chenam kali, kelet chot seta, monit aphan panahok thek.

06. “Monit” pu lote kam choklem nangji ; kam keklemkle abang ke monit ta kali.

07. Pirthe ke artingvoi, ili dothing ke hingno.

08. Pap aphan ke lang selet nangji, bonta papi aphan ke lang selet apot kali.

09. Amek kachecharche abang le amek kave kali, amethang akechokche do pu chechinilor ta adai kachethek-longle abang si amek kave abang.

10. Ejo arnisi an kechoche chot pen ke monit thithe, bonta mek sirip apor an le arnam elong ave anta monit rengre.

11. Ketok pen le peklang seta kaporhi abang le ave te ketok pen ale ave.

12. Keja abang le do seta aphi kedun abang le ave te keja pen ale ave.

13. Kacharli le charli seta kethek le ave te kacharli pen ale ave.

14. Keklem le klem seta klem pememe te keklem pen ale ave.

15. Abang le lengbut seta a-ok sojor pen si kedo nang lepute keleng pen ale ave.

16. Arje le mesen seta akam kaningjoime le ave te arje keme pen ale ave.

17. Alam le jumesen seta alam kajume ateng pen akam pen chetonte te alam kajume chot ke ale ave.

18. Arnam kardom – ening aklong pen le ardomde te kengphu kapetong chot ke ale ave.

19. Ahok pen kelong akhi adat kali lepute keplang kephi pu ta ale ave.

20. Asomar atum api apo aphan ” pei ,po” pule hang seta alam aki le kroikre te ” pei, po” pu kehang pen ale ave.

21. Kristian le man seta kristian a-ot adur ateng dode te kristian keman pen ale ave.

22. Kacheti kachevarrokji aphan chot lepute kachepachor pen ale ave.

23. Kache-enkokji thalalak lepute aphrang pen “jircheklekle pu kachekam ale ave.

24. Kache-enkokji aphan kali lepute ” ne nang phan ning nang dok”-( i love you) pu kepu pen ale ave.

25. Mo aphi kachebohongdutji aphan chot lepute aphrang pen kachepajirpo nangji ale ave.

26. Aphili ahut kapethilotji aphan chot lepute oso aphili kapedo pen ale ave.

27. Osomar kapelongji aphan aning hanghe te penanso kachobocherapji pu aning kehang ke ale ave.

28. Kekat rongji thalalak lepute ron mai kedun pen ale ave.

29. A-ok le choche lepute aphak kachonghor kachepeduk pen ale ave.

30. De ke isi akibu, pirthe aphan theng-iphun un.

31. Man ke kehang pen le kelong kali, kepi pen si kelong.

32. Man le nangji te bang aphan le man pinon.

33. Man ke ador so-o, nam un-e, bonta apun kedo abang ke akejoi ta long.

34. Man ahormu ke ingprim ehongvet seta ador kethe pu un-e.

35. Ok ke lang along si ri nangji, man peng ke ekam along si ri nangji.

36. Ephongle amek do lote, paramdet seta angpram ke do.

37. Ephong le dakpet lote ingthunlok seta athit ke do.

38. Ephongnat ta chobeiri, mo phong pharo ahok alam ta ajor avedet apot.

39. Ahut pen ahut loji chelangbomtu, nangli mahang koson ma, chechini nangji.

40. E-arje aloji ke loji binong helo, ening aloji ke baibel helo.

41. Akeme kevanji aphan kachobai ke pap kali. Bang aphan kapanahokdet akachobei si pap.

42. Thekkei pen bang ahormu keponpidet ke kanghu kali, bonta bang ahormu thek-lor seta hanghepin pen ponpidet si kanghu.

43. Ase kethe aling le kachingchek kali, chingchekji te aseso pen ta chingchek me.

44. Emek ke kelang-i aphan pu, bonta ning le hang te emek penpepin ta bang aphan lang me.

45. Ili kethan alam ano nang kachedendun atum, ano det le kedo chot kali, amek ta do.

46. Ajat ason ta erideng le ave te bang aphan pi apot kali.

47. Eno ke karju-i aphan pu, bonta lam juno aphan ke eno chetok-het nangji.

48. Ok ahan tame, hanserong ahan tame, aphule arlo ke dojoi seta achar ta angnim long.

49. Bang aphan kechokche kejongdun pen kapekeng thek abang ke mesen, bonta la pen apar amethang kechokche kachechini pen kachepekeng thek abang akeme lit-lang.

50. Arnam aphan kanghon thek abang binong ke monit aphan si kanghon kapethe.

51. Ajisovet angkok pen ta arni atur nang turvor thek, lason thakthak si ethevet alam keme pen ta monit gian long-i thek.

52. Epak akitap keme kapanahok lapen inut amonit aphan apran ke-en, thangnat ta prekpre.

53. Monit, kamatha parsikdamde te ” kachepebi” ke kajok-lu akam pu si ketindam, bonta kamatha parsikdam lote ” Kemesen akam” pu si chinidam.

54. Monit, kamatha kanglang abang ke ” kachepethe-oi” ke kethenai akam pusi ketindam, bonta kamatha karsik abang ke lake ” kam adu” pusi chinidam.

55. Marat mareng api ke amethang aphan si cherengvong anchot, bonta monit ke bang aphan ta rengpi.

56. ” Ebaha kelangno” – arveng chepur si nang kangjar si kevang, lapen kachedamthu ahut ke akeng pen si dam.

57. Kam kachoklemji aphan si monit amahang nang kethek; badu tame kam kachoklemkle abang ke monit kali.

58. Monit, bang akahingno aphan lang selet thek, amethang ke ko-an tong keme lone, lake chedipchek.

59. Monit, akai keding kethi ke alangli kam aling lo.

60. Kedamtang akai aphan kachinidamde abang ke kevangji akai aphan ke mathadam un-e.

61. Monit ke akrom ajom arahi lapen athok penle aman kedo kali, akam keme pen si aman do-i.

62. Arnam aphan le aman piji te monit aphan le aman pinon, pima arnam ke monit along si do.

63. Kacheroka, katangnak, kamatha aklong kelele abang ke ” Ahok” pu kopi ma, ” keme kechok” pu ke kopi ma, lake chinine.

64. Kachohangser pen kelong akanghon apar ta kesung ekachinidundet pen ekelangdun akanghon themu.

65. Kachebohong ahut ke bang hini ta ano ingthongdet, lasi ase theroi titi.

66. Keram atangka pen preng ketu-i ke preng jut-i-e.

67. Ning ingsamjin pen kecho long a-ok areppi kechome angsi an sose.

68. Pinso an ke epo thenai, arloso an ke apei thenai.

69. Arloso an ke episo menei, ejirpi jirpo an ke kesung arni ekerap abang menei.

70. Ajak kedingnai atovar ke ehotor ahem atovar helo.

71. Ajak kethinai atovar ke ejirpi ejirpo ahem atovar helo.

72. ” Ne ke hor jun” pu kepu ke chokche, “hor ne phan ne jun” pu kepu si kechok.

73. Kedukdet ahem ke keplang ahem a-arloso vanri, bonta keplang ahem ke keduk ahem a-arloso pon tame.

74. Kaporhi kedo abang pen kaporhi kave abang kachepachor ke chainong pen gadha kapahai pen gari kapevung ason lo.

75. Kam keklemrap atum angbong abidi keprekjam ke hormu kacharchong kachepanungrap ason lo.

76. Noke nopak pen kachero-ak amek ke paramdet un, bonta ede pen kelap-ak amek ke param un-e; paramdet seta abi ke dover.

77. Lamsam lamdok kecho long abang ke aning kansam long. bonta lamthu lamdok kecho long abang ke pok kansir si long.

78. Bang aphan lam keho phinri, mo nangli phan ke lam keso nang phindet na.

79. Hanthor kecho ke eso seremdet, kajok-lu abang pen kachelang ke ening siksakdet.

80. Nangli harchi chethek-long ingtungte te, atur kevang anat le pangnonon, nongno le charju ingtungte te kam keme le klemnon.

81. Arjapji te bang akeng pen kali, emethang akeng pen nangji.

82. Kemang kantuipik pen apar te asapso akamso keklem kapechun memu.

83. Karlen chot ke chokche, pero thek nangji.

84. Nangli phon ketan ke che-opjoinon; nangli ingthin ke bang aphan ta arjap-linkluknon.

85. Monit ke bang aphan kethan kemun pen si kethek-i.

86. Ning kethi ke kajok-lu pen si kapangcheng lapen aning kacheteng pen si kapejut.

87. Leledet abang mute le derchet abang memu.

88. Ning kethi kachardakphlut jokphlotji aphan ning kekang le do seta ning kachekhang bor-i helo adovai.

89. Kachohangnak kachorek pen apar te epok ingkovang memu.

90. Kemang peme pen kabor-inak, lapen, kesung kepho, la sonni kachetong pen monit thek-i re-i.

91. Phonek si kethek. phonok si kechok.

92. Bang ne peronang pu aning kehang abang ke, ro bang ave te aning oilak, bonta kero kelong kangtung kerirok-re abang ke kemesen apot bang le puduntot seta aning oidamde.

93. Hindu adhorom angbong ke monit, arnam keman pu kachethan do, bonta kristian adhorom angbong ke arnam si monit keman pu si kachethan.

94. Kachohangser pen kelong akanghon apar ta kesung ekachinidundet pen ekelangdun akanghon themu.

95. Apok kangchir abang ke an si keri, gian kangchir abang ke gian si keri.

96. Ingthe-ingho arlo kedotik ke hijim mememe, bonta ingho pen nang bartanglo te checho ingtungte; kahijim si hijimthu meme.

97. Kanghu aso aphan ke phlung ting-ei nangne, ametang katdet.

98. Kachepaduk abang ke dukde, keplang si plangthu.

99. Monit kachepereng-i aphan krongni atovar si kedam; pap atovar lapen ahokpet atovar.

100. Kethekser kereset abang seta amethang le ajor chebirtite te ajor do thekthe.

101. Thesere an ke phingnu lapen mensopi menei.

102. Kam pharo tame, apor penpe te, tangho ta chunche.

103. Ok pen an le chonodak lepute, a-ok a-an le kahingno kali, angho si kahingno.

104. Lam keme le junodak pu lote, alam le kahingno kali, karju abang si kahingno.

105. Voti arlo pen vo aso pelongji te pachar-um nangji, kapanghang kali.

106. Kachoro alam pharni do, kachoro binong lapen kachoro parlin.

107. Kangnek pharni do: Ning arong akangnek lapen kangnekchoi.

108. Keplangpik abang ke amethang akhi pen le keplang-i kali, bang akhi pen si                              keplang-i.

109. Sang kemor a-an ta araki do, cho lote kangkrang chethek-i.

110. Arje kelangno arloso ta akam ke ningjoime, kabocherap pen hem rit man-i.

111. Hotur ke ” Cancer” akeso ason. ephong le longlok te me un-e.

112. Ingri ingtung ongte hor junnon , Pasi-i ingtung-ongte henru akevai le chonon.

113. Tam long ingtung- ongte tam kelong meme akam le chomatha non.

114. Duk ingtung ongte chepaselet non , keplang le kangtungte kamle choklem non.

115. Kephole kangtungte kepho meme akam le chomatha non. pho- ingtungte                              te kachingrai le chingrai non .

116. Ajat akam ta ang-ang kelit ke hingno , chokchit anchot nangji.

117. Ingti ta apar jokjet ke hingno , nudeng ta apar pankangjet ke hingno.

118. Dovai daro ke ok pran me-i, bonta apar chojet ke apran si dam-i.

119. Ok pran ke ok an kechosi kereng-i , bonta chemadade lepute chochedet nangji.

120. Kejek, lapen kese lake isivit mnangnak, Bonta isivit kali.

121.Kejek puke kam aphan si kejongdam , lapen Kese ke kecho kejun aphan si                              kejongdam.

122.An k akemor asang a-anta ingkrang -i bonta lam ke lamthu lamdok ason son ke                   apok ingsir-i.

123. Lamsam lamdok lapen lamthu lamdak lake isivet nangnak bonta isivet kali.

124. Lamsam lamdok ke monit aning kamsam long-i bonta lamthu lamdok ke monit let dun-i.

125. Eripak along sonni abi do , akeso abi lapen akangsam abi.

126. eh ingho along pen sonni alam nangbar lamsam lamdok lapen lam keho.

127. Bang aphan kachomosoi ke ave chopur aphan anvet aphi an ke amethang phoset.

128.Kachinine adim kedam ke ede helo etovarpi.

129. Katherakju lapen katherakse lasonni ke isivet nangnak bonta isivet kali.

130. Nang pran kedambupji alam nang piso aphan chethanri.

131. Kejoklu abang aphan lam amet thanri.

132. Kachingkino abang aphan kam chotoidet ri.

133. Kasedengkak abang aphan chelang pesori.

134. Anthin kelangnodak abang pen ajir chebiri.

135. Ade kelangnodak aphan bang alam thanri.

136. kaselet-hui abang aphan kam choklem nangji pu choperedet- ri.

137. Hor kangritang abang aphan hor pithudetri.

138.Kachetonte achor pen bocherapdet ri.

139. Me sakchui pen -keng meh ingdakdedet nangji pu ke mathadamdet ri.

140.Bang aphan kasorsar ade meleptep pen bang nangro abang doji puke tovar cholangri.

141. Nangli phan nang ketangte alam lapen akam along chejokdundet ri.

142. Bang alamhoi karjulong pen ning oitongdet ri.

143. Nangli kethek kachini kedo lapen ke un ason chepaklangdet ri.

144. Nangliphan  nang kachopho abang aphan alar hui det-ri.

145. Nangli akethe abang pusita chepethe oiri.

146. Nangli kahingno kachomatha apot akeme nang klangji puke tovar cholangri.

147. Nangli le mesente bang nang khinde seta nangli ning oiri.

148. Nangli le hingnodak te bang nang ro sita nangli ning arongdet-ri.

149. Kamek -i abang aphan ke ingthur te amek ingtang, bonta kachepamek -i abang aphan ke ingthur un-e, ingthur ong amek kejang chip ong.

150. Ning keme pen bang aphan kerap ke akejoi damde alar chelongthu.

151. Dhorom akam aphan ke dam -i  akeng ke langme-o

152. Dhorom alam kaningje -i ade angtur ke langme-o.

153. Lam juno kaningje ke angho arlo vohi kedengde kedo pen thangnat  ta prekpre.

154. Kechoche pen kachingnang ke chekobirmo – ong chip – ong, Bonta chekobirdet lote amethang amat jok phun.

155. An kecho kangtungte ke a ok kahingno angthek, Lam keme karju kangtungte ke aning kahingno angthek.

156. Karju soni do kachini kangtung aphan , lapen lam kachepathu-i aphan.

157. Kachini kangtung pen karju abang aphan ke than lote aledo, bonta lam kachepathuji aphan karju abang aphan ke than seta ale ave.

158. Alam kave lapen ano kangthong abang aphanke eri pen angthek le paklang anta arju thek, bonta kachingno abang aphan ke ase kethe penle than seta arjuthekthe .

159. Kemesen amonit ke thilot aphita ningjoime bonta kaching kinodak amonit ke renget ako penta ningjoino.

160.Eman ke bang arideng sido lapen bang aman ke eridengsido.

161. Hem ahemphu abang kave ahut ahem kachingdang ke bang pelut un e nang pu aphan kali. ahemphu abang ave pu angthek chot.

162.Kerap ke kerap keri abang aphan le kerap nangji kali kerap kenangji abang aphan si rap nangji.

163. Ajat akam tame apor dolang mo ta chok pu pu apot kali halabangso a mo apor ke kopusonpone.

164. Monit badu tame akeme kachinidunde le katangnak kali kahingno kar-i si kachepatnagnak.

165. Monit badu tame akahingno kachomatha thekthe le akeme keklem kali, akahingno aphan aning kehanghe apot.

166. Neli le ephong nang chomosoi longdet te neli si kechokche, bonta phongni le nang chomosoi longpop te nangli si kechokche.

167. Hanthor ahan aphan ke amanthu do, bonta acherei ketan abang alam apahn ke amanthu ave.

168. Bang aphan anong kejo kapachar patmit ade ke hi kebon abitukili arveng pen isivit lo.

169. Keja atum ajahak keja atum ke aphrang si kedam lapen ajahak akeja atum ke aphi si kedun.

170.Sini ta dokjin nok lang ta dokjin , bonta laheihui pen apar elam akedok abang dok mu.

171. Lamsam lamdok lapen lamthu lamdok lasoni ke isivet kali akeprek do.

172. Hor det le kahingno araki kedo kali ningso ninghi aning ta kahingno araki do.

173. Kavedet abang aphan ke narlo chitim seta jirlo klolin thengkok ason.

174.  Kesungdet abang aphan ke dengrongle ingnek seta aning arlo ke amekri palangbungthor.

175. Bang aphan kanghon ke bang aphan kali  emethang aphan . lapen bang aphan kelangselet ta bang aphan kali emethang aphan.

176. Nangli ning kangsam pendo ingtungma? Bang pen chepemenon, anke nangli ning kangsam longpo.

177. Ning ke-oi ning kanglit abang aphan ke lun tomo le arjulong sita kachiru ase ason si mandet.

178. Edeng kedo ahotur mute akahelo kedo ajirpo memu.

179. Jirpi jirpo pharnido kejoike ahut ekachelangdun pen kesung ahut eke o dunbup abang , lapen kejoike ahut le cheheloving seta kesung ahut ke ekapatebokdun abang.

180. Kajok lu abang ke alangli richimun ehong pen bang akechokche kejong ahut alangli richimun hongthom ke alangli phan si kechokche kejong pu chechinine .

181. Kereset abang ke bang akechokche jongthapthe pima ne ta kechok lem abang kali pu alangli chechini lapen chemathadam.

182. Bang akechokche kachotur dunlur abang helo akechokchenai abang.

183. Kebok bor-i pen kapedo adai ke adai kali.

KARDOM